İraqda hökumət, təmiz enerji mədəniyyətini yaymaq məqsədilə 2.500 imkansız ailəyə pulsuz günəş enerjisi sistemləri təqdim edəcək.
İraq Hökumətinin Kommunikasiya Qrupu, təmiz enerji mədəniyyətini təşviq etmək və digər vilayətlərdə də yaymaq məqsədilə imkansız ailələrə günəş enerjisi sistemlərinin pulsuz təqdim olunacağı yeni bir təşəbbüsə start verdiyini açıqlayıb.
Qrupun rəhbəri Ammar Mun’im bazar ertəsi günü verdiyi açıqlamada bildirib:
“Bu yeni təşəbbüs, təmiz enerji mədəniyyətini təşviq etməyə yönəlmiş bir təcrübədir və digər vilayətlərdə də tətbiqi planlaşdırılır.”
Mun’im əlavə edib ki, hazırda Əmək və Elektrik Nazirlikləri tərəfindən müəyyən olunmuş meyarlar çərçivəsində müəyyən xətlər və yüklər daxilində olan ailələr hədəf qrup kimi seçilib. Bu sistem vasitəsilə həmin bölgələrdəki elektrik yükünün azaldılması və günəş enerjisinin bu ailələr arasında paylanması nəzərdə tutulur. Layihə hökumətin kommunikasiya qrupu tərəfindən icra olunacaq və günəş panelləri ianəçilər vasitəsilə təmin ediləcək.
Mun’im əlavə edib ki, günəş enerjisi sistemləri təxminən 2.500 iraqlı ailəyə mərhələli şəkildə paylanacaq.
Qeyd edək ki, daha əvvəl İraq Elektrik Nazirliyi ölkədə günəş enerjisinin yayılması üçün dörd əsas istiqamət müəyyən etdiyini açıqlamışdı. Bu çərçivədə evlərə günəş enerjisi sistemlərinin qurulması və ödənişdə asanlaşdırmalar da nəzərdə tutulur.
